ຂ່າວສານ

ລັດຖະບານ ໄວ້ວາງໃຈມອບສິດໃຫ້ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ

ເປັນຜູ້ສຶກສາ-ສໍາຫຼວດອອກແບບລະອຽດ ເພື່ອພັດທະນາໂຄງການທາງລົດໄຟ ລາວ-ຫວຽດນາມ.

 

ໂຄງການພັດທະນາເສັ້ນທາງລົດໄຟລາວ-ຫວຽດນາມ ເຊິ່ງແມ່ນຈາກເມືອງທ່າແຂກ ແຂວງຄຳມ່ວນ ຫາ ທ່າເຮືອ ຫວຸ້ງອ່າງ ສສ ຫວຽດນາມ ໄດ້ມີຄວາມຄືບໜ້າເປັນກ້າວໆ ພາຍຫຼັງທີ່ລັດຖະບານ ໄວ້ວາງໃຈບໍລິສັດ ມອບສິດໃຫ້ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ເປັນຜູ້ສຶກສາ-ສໍາຫຼວດອອກແບບລະອຽດ ເພື່ອພັດທະນາໂຄງການທາງລົດໄຟ ລາວ-ຫວຽດນາມ ເຮັດໃຫ້ການເຊື່ອມໂຍງລາວກັບພູມີພາກກໍ່ຄືສາກົນມີຄວາມສະດວກຍິ່ງຂຶ້ນ. ຫຼ້າສຸດ, ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ໃນການສຶກສາສໍາຫຼວດ-ອອກແບບລະອຽດຂອງໂຄງການດັ່ງ​ກ່າ​ວ. ຂະນະທີ່ ປະທານບໍລິສັດເປີດເຜີຍ ການສໍາຫຼວດຈະໃຫ້ສໍາເລັດພາຍໃນ 8 ຫາ 12 ເດືອນ ແລະ ຄາດວ່າຈະສາມາດລົງມືກໍ່ສ້າງໃນທ້າຍປີ 2021.

ໂຄງການພັດທະນາເສັ້ນທາງລົດໄຟລາວ-ຫວຽດນາມ ເຊີ່ງແມ່ນຈາກເມືອງທ່າແຂກ ແຂວງຄຳມ່ວນ ຫາ ຊາຍແດນລາວ-ຫວຽດນາມ ແລ້ວເຊື່ອມຕໍ່ໃສ່ກັບທ່າເຮືອ ຫວຸ້​ງ​ອ່າງ ແຂວງຮ່າຕິງ ສສ ຫວຽດນາມ. ຈຸດປະສົງຂອງໂຄງການເພື່ອການເຊື່ອມໂຍງລະຫວ່າງລາວກັບພູມີພາກອາຊຽນທັງເປັນການພັດທະນາພື້ນຖານໂຄງລ່າງເສດຖະກິດ, ສ້າງສິ່ງອໍານວຍຄວາມສະດວກດ້ານການຄ້າ ແລະ ກະສິກຳທີ່ເປັນທ່າແຮງໃຫ້ກາຍເປັນອຸດສາຫະກຳທັນສະໄໝເທື່ອລະກ້າວ; ຫັນຈາກປະເທດບໍ່ມີທາງອອກສູ່ທະເລ ກາຍເປັນປະເທດເຊື່ອໂຍງກັບພາກພື້ນ ຫຼື (Land Lock to Land Link) ເພື່ອຜັນຂະຫຍາຍແຜນພັດທະນາເສດຖະກິດ-ສັງຄົມໃຫ້ປະກົດຜົນເປັນຈິງ ໂດຍລັດຖະບານໄດ້ມອບສິດໃຫ້ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ເປັນຜູ້ສຶກສາ-ສໍາຫຼວດອອກແບບລະອຽດເພື່ອພັດທະນາໂຄງການດັ່ງກ່າວ.

ຫຼ້າສຸດ, ກໍ່ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບການສຶກສາ-ສໍາຫຼວດອອກແບບໂຄງການທາງລົດໄຟຈາກຕົວເມືອງທ່າແຂກ ແຂວງຄຳມ່ວນ ສປປ ລາວ ໄປຫາຊາຍແດນລາວຫວຽດນາມ ລະຫວ່າງ ລັດຖະບານລາວ ແລະ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ໃນວັນທີ 15 ຕຸລາ 2019 ຜ່່ານມາ ທີ່ໂຮງແຮມແລນມາກ ແມ່ຂອງຣິເວີໄຊ ນະຄອນຫຼວງວຽງຈັນ.

ເຊິ່ງເປັນການລົງນາມຂອງ ທ່ານນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຈັນທອນ ສິດທິໄຊ, ປະທານບໍລິສັດປີໂຕຣລ້ຽມເທຣດດິ້ງ ລາວ ມະຫາຊົນ ກັບ ທ່ານ ໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ, ທ່ານ ໂອໃດ ສຸດາພອນ ເຈົ້າແຂວງຄຳມ່ວນ, ທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ທ່ານເອກອັກຄະລັດຖະທູດອິນໂດເນເຊຍ ປະຈໍາລາວ, ພ້ອມດ້ວຍແຂກຖຶກເຊີນເຂົ້າຮ່ວມ.

ທ່ານນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ

ທ່ານ ຈັນທອນ ສິດທິໄຊ, ປະທານບໍລິສັດປີໂຕຣລ້ຽມເທຣດດິ້ງ ລາວ ມະຫາຊົນ

ໂອກາດດຽວກັນນີ້, ທ່ານ ຈັນທອນ ສິດທິໄຊ ປະທານບໍລິສັດປີໂຕຣລ້ຽມເທຣດດິ້ງ ລາວ ມະຫາຊົນ ໃຫ້ສໍາພາດວ່າ: ຈຸດປະສົງຂອງໂຄງການພັດທະນາເສັ້ນທາງລົດໄຟຈາກຕົວເມືອງທ່າແຂກ ແຂວງຄຳມ່ວນ ໄປຫາ ທ່າເຮືອວຸ້ງອາງ ແຂວງຮ່າຕິງ ສສ ຫວຽດນາມ ເປັນເຊື່ອມໂຍງການຄ້າກັບອະນຸພາກພື້ນ ແລະ ສາກົນ, ທັງເປັນການຫຼຸດຜ່ອນຕົ້ນທຶນການຂົນສົ່ງສິນຄ້າ ແລະ ບໍລິການ ທັງເປັນທ່າແຮງໃຫ້ແກ່ການພັດທະນາເສດຖະກິດ ເຊິ່ງບໍລິສັດປີໂຕຣເທຣດກໍ່ເປັນພຽງສ່ວນໜຶ່ງໃນການຊຸກຍູ້, ຕອບສະໜອງນະໂຍບາຍຂອງພາກລັດ ແລະ ໄດ້ຮັບສິດຈາກລັດຖະບານເປັນຜູ້ພັດທະນາ.

ທ່ານ ຈັນທອນ ສິດທິໄຊ ໄດ້ອະທິບາຍຕື່ມວ່າ: ເວົ້າສະເພາະໄລຍະທາງໂຄງການປະມານ 240 ຫາ 270 ກິໂລແມັດ ເຊິ່ງເບື້ອງຕົ້ນຈະສຶກສາແຕ່ເມືອງທ່າແຂກ ຫາ ຊາຍແດນລາວ-ຫວຽດນາມກ່ອນ, ຫຼັງຈາກໄດ້ຮັບອະນຸຍາດຈາກລັດຖະບານ ສສ ຫວຽດນາມແລ້ວ ຈຶ່ງຈະສືບຕໍ່ສຶກສາຈາກຊາຍແດນລາວ-ຫວຽດນາມ ໄປຫາທ່າເຮືອວຸ້ງອາງ ເຊິ່ງຢູ່ເບື້ອງລາວປະມານ 150  ກິໂລແມັດ ແລະ ຢູ່ເບື້ອງ ສສ ຫວຽດນາມ ປະມານ 120 ກິໂລແມັດ. ຄາດວ່າຈະສໍາເລັດການສໍາຫຼວດ - ອອກແບບລະອຽດພາຍໃນ 8 ຫາ 12 ເດືອນ; ເຊິ່ງໂອກາດຕໍ່ໄປ ຫາກໄດ້ຮັບອະນຸຍາດຈາກລັດຖະບານລາວ ແລະ ລັດຖະບານ ສສ ຫວຽດນາມຢ່າງເປັນທາງການ ພວກເຮົາສາມາດກໍ່ສ້າງເສັ້ນທາງລົດໄຟນີ້ໄດ້ໃນທ້າຍປີ 2021 ຄາດວ່າໃຊ້ເວລາ 3 ປີໃຫ້ສໍາເລັດກໍ່ຄືໃນປີ 2024.

ໃນສ່ວນຂອງຂະໜາດລົດໄຟ ແມ່ນເປັນປະເພດລົດໄຟທາງດ່ຽວຕາມມາດຕະຖານສາກົນເພື່ອຮອງຮັບການຂົນສົ່ງ ແລະ ໂດຍສານ ເຊິ່ງຄວາມໄວ ປະມານ 90 ຫາ 120 ກິໂລແມັດຕໍ່ຊົ່ວໂມງ ເຊິ່ງນໍາໃຊ້ອຸປະກອນ ແລະ ເຕັກໂນໂລຊີຈາກປະເທດອິນໂດເນເຊຍ. ຂະນະທີ່ ການລົງທຶນໃນຮູບແບບ BOT ຫຼື PPP ທັງນີ້ກໍ່ຂຶ້ນກັບການອອກແບບ-ສໍາຫຼວດໃຫ້ແລ້ວກ່ອນ ຈຶ່ງສາມາດໃຫ້ລາຍລະອຽດວ່າຈະລົງທຶນໃນຮູບແບບໃດ?.

ສໍາລັບມູນຄ່າການລົງທຶນ ພາຍຫຼັງສໍາເລັດການສໍາຫຼວດ-ອອກແບບລະອຽດແລ້ວ ທາງບໍລິສັດຈະຖະແຫຼງຂ່າວໃຫ້ຊາບອີກຄັ້ງ.

 

ລາຄານ້ຳມັນ (30/11/2019)

 

 

 

> ຂໍ້ມູນເພີ່ມເຕີມ...

ຄູ່ຮ່ວມຍຸດທະສາດທຸລະກິດຂອງພວກເຮົາ